查看: 2948|回复: 1

掌相教學口述篇

[复制链接]
发表于 2011-1-21 01:02:58 | 显示全部楼层 |阅读模式
頭長而方富貴久長,頭長而圓衣祿綿綿。
頭部長而方,長而圓、並唔係淨止長帶方,長而帶圓,重包括前額、頂門、後枕、側腦四個部份,有呢四個部份而又飽滿的,富貴長久,絕不出奇,例如林肯,頭長而圓就缺乏腦門,所以無貴。
頭短而圓終有衣祿,頭短而扁困頓難免。
短而圓就係缺乏頭頂腦門,可以有富,但係無貴,頭頂唔夠飽滿,求貴始絡差,扁即係無後尾枕,無枕骨就蝕底,平晒的,四十歲後就好有問題,就要耳後有骨就可避免事業破敗。
頭若扁生早歲迍邅,頭若偏生中年破敗。
扁生即係最重要四個部份,唔夠飽滿,呢度話早歲彖煎,就一定係前額凹陷。偏生即係斜、歪、呢度話中年破敗,即係左右顴骨有高低,要去到敗就一定係高低或者大細面好明顯。
頭有兩角必有官祿,頭有四角其貴非常。
書上面多數話頭,其實應該係額先至,兩角即係日月角,日月角起並唔係真係有兩隻角,而係日月角部位飽滿,好似亞松,但係如果露骨就刑父母,頭有四角即係日月角加輔角,亦即係包括埋官祿位同埋印堂,就一定有權力。
頭大無角不是粗人便是木作。
頭大,係講過大,圓周應該係24吋,女人就22吋,過大過細都係唔好,粗人即係體力勞動,木作即係手藝,以前的觀念除靠老婆賣首飾供佢讀書就係最好之外,其他自己搵錢讀書都係低級。
有日月角骨無輔骨者,有輔骨無日月角骨者。
有日月角骨即天庭位飽滿,但額部左右瀉,形碩凸,如果中線飽滿,則少年得志,但係以後點樣就唔知,但多數都起落好大,有輔骨而無日月角骨即天庭位破,但仍然係有前途的。
無日月角骨與輔骨僅得額圓者,有日月角骨輔者。
額圓者多數係商人,因為額無輔角表示配偶父母對你無助力,無日月角父母無助力,最有可能就係白手興家。有日月角而又有輔骨,出身家庭一定有番咁上下。
有邊地骨無日月角骨輔骨者,邊地骨日月角骨輔骨皆起者。
邊地即額邊有骨即額廣,雖然唔飽滿,但勝在人聰明,諗野快,有邊地骨而又有日月角更加埋輔骨,即係話呢個人18歲就開始行運,要氣長久就一定要加上後枕骨夠厚,如果淨係有前無後,只係一陣風光。
頭方頂高居尊天子,額方頂起輔弼良臣。
頭方要夠長,包括前後左右骨要厚,加上頂門,即係天靈蓋高,主事業長久,額方即係額如壁立,有分辨是非能力,亦夠忠心。
頭大碩闊王侯相,虎頭燕頷封博望。
博望侯係張騫出使西域的封號,額開闊好似把扇就叫虎頭,頦即係下巴,頤即係腮幫,下巴豐滿同頤相連叫燕頷,有呢D形格想無福都難。
頭長面長衣祿相當,頭短面長覓食他鄉。
頭長即係厚,頭厚面長即係成個頭好飽滿,一定出生於良好環境,頭短即係薄,後尾枕骨薄就一定早出離家搵食。
頂平頭圓額又方早歲姓名揚,腦後橫生頂又平官祿倍增榮。
頂平唔平唔緊要,額方圓即係天庭飽滿,得父蔭,好後生就有名氣,但係要長久保持就要腦後橫生,即係後尾枕骨要厚,未見過無後尾枕骨的人到中晚年仍然富有的。
頂骨連鼻文拜相,脊骨連枕武封侯;頭圓頂方還多福,頭尖頸細憂貧。
有個名好好聽的,叫做伏犀貫頂,呢個人就算未讀過書,都可以出人頭地。就好似老虎咁威猛,所以投身武職就一定升官快。思想快捷長遠,一定樣樣好,頭尖就一定無計劃,頸細身体差,睇醫生都睇晒D錢。
腦削額塌庸俗子,頂尖額窄不為官;頭小額小多無祿,有頭無頸二十亡。
腦削思慮唔夠週密,額塌想D野好無謂,志大材疏,何止不為官,就算做平民都好辛苦。頭尖額窄唔單止無祿,簡直生活都有困難。有頭無頸係話頸短,頭大而頸短一定多病,二十死就未必。
腦塌額窄人急燥,頂尖額塌性輕浮;額窄頭大夫妻必礙,額突腦潰早剋中敗。
腦塌係後腦扁,加上額上多茸毛,就小小野都唔忍得。頭頂高聳想野好快,額塌即係即係一路斜上去,呢人做野好唔穩陣。額上寒毛多就形成窄,後枕骨凸表示性慾旺盛,如果兩個都係咁橫就無問題,但係有一方面唔係的就有麻煩,額凸後枕凹,中年小心。
頭偏額窄難言福壽,根低梁塌定主財空。
頭形生得唔正,就好難會有一個好額,福就肯定無,壽就未必,因為有無壽亦睇頦宮,頤位先至可以決定。鼻為財星,塌即係鼻樑有節,中年有問題,根底即係山根低,41歲後就當有一劫。
天庭骨隆起,眉隨骨起,佐串骨角起,鼻骨芽起。
天庭骨包括日月角,輔角開闊,起即係飽滿,官祿宮高就容易身居高位。呢個起唔係凸起,係有骨而隱伏,太凸呢人追求野未必用正當的手段。佐串骨即係左右塚墓,有小小拱就叫起,就算額形唔靚,到廿六七歲都有運行。芽起者,山根圓,準頭圓,就算唔大貴,都會有好多貴人相助。山根窄小,氣量淺,如山根欺眉骨,女主刑。
顴骨平平起,太陽穴線起,頸骨平闊起。
顴骨唔夠高,表示成敗都好快,或者有顴無面,即係顴高面珠凹,呢個人就寡情薄義。太陽穴亦即係理財位,呢個位飽滿,主識得處理金錢,有辦法將錢養大。頸骨連枕骨,形格威猛,向武職發展較大機會。
頂圓腦厚有為有守,頂圓腦塌中運必敗。
頭頂圓的多數有父蔭,有所作為,腦厚有祖蔭,腦厚即係髮轉位置,如果兩樣都有一生都順利,就算有所損失,都唔會全部,會好快復完。頂圓就有父蔭,腦塌即係後枕平或凹,處事唔得慎重,中年後就最多波折。
頂圓腦塌兼潰爛,中年破敗晚更淒涼。
呢度的潰瀾並唔係真爛,而係無頭髮,即係髮轉位禿頭,淨係呢個位光禿晚境就有問題,有就話缺乏祖德,不過有無祖德唔緊要,最緊要係有祖蔭,但係禿頭體力好,亦有魄力,晚境亦不玫於淒涼。
頂平福祿,高隆貴壽,豐隆富貴。
唔單止頭頂圓先至有父蔭,連頭頂平而厚亦有父蔭,高隆好似蔣介石個頭,半隆即係兩邊寬闊,表示呢個人的腦袋好大,天才多數有呢類形格,但係白痴亦有呢種形格,所以唔使太開心。
頂尖孤刑早,陷則壽夭而富貴難,暴露勞苦而刑剋特重。
頭頂尖婚姻有問題,孤者獨身,刑者剋妻,頂凹則智力低,富貴當然艱難,但係未必會夭,短命就要睇好多。呢度講後生光頭,年少禿頭想唔辛苦都難,刑剋講人緣差亦主夫妻緣份唔好。
腦圓而大祖德正隆,腦長而圓祖德綿綿。
有祖蔭同有無祖德係兩回事,呢度講只係有又父蔭,腦長而圓有豐厚的蔭護,腦長即係後尾枕厚。
腦骨潰爛祖上失德,腦窄不圓貧苦中年。
腦骨潰爛即係後尾枕無頭髮,後尾枕頭髮特別少,祖上失唔失德就唔知,無祖蔭就肯定的。腦窄即係側腦唔發達,側腦唔發達表示呢個人無保護性,又無鬥爭性,中年貧苦係應該的,因為中年係一個人最需要搏殺的時候,如後枕厚就都好。
頂骨平伏起,枕骨強起,枕高而大遠祖福澤,枕小而圓父祖餘蔭。
平伏起亦即係唔低陷,唔露尖,有責任感,可以管錢。後尾枕骨連肉,有問題就有人幫,最主要係經濟問題。髮轉個位特高,主長輩助力,在社會上有年長的人特別喜歡你。摸落去唔覺尖,就表示後生的時候有父蔭。
枕骨斜出謀生乏術,枕橫骨藏福祿綿長。
斜出即係歪,頭骨歪主奔波勞碌,未必唔可以生存,但係一定辛苦,最好就多頭髮,如果小頭髮就好難改變。後枕骨發達望之好似火星人,容易有橫財,長唔長命就要睇埋其他部位。
枕陷而露敗業滅絕,孤骨而露貧苦無助。
枕低陷就因為持續性唔夠積極,所以遭受少少挫折就無心機。孤骨即係特別特尖凸,過凸就早離家,同時亦少助力。
枕陷且不時挨餓,枕陷成坑必有後殃。
陷破包括歪或無髮,平扁,缺乏一個安定的居住環境。枕陷成坑思想唔夠慎密,容易沖動,唔單止後生係咁,老一樣,所以話有後殃。
瘦人頸短三十前死,肥人頸長四九而亡。
人瘦頸短就鐘意冒險,死就未必,但係多意外就一定的。人肥頸長未必短命,要睇頸的粗幼,長而粗無問題,長而幼就大問題。
瘦人頸長不富亦安康,肥人頸短早入翰林館。
所謂長係由髮腳至頸椎骨,唔超過一隻手掌位,如果超過就係過長,瘦人頸太長就叫馬頸,凡有馬頸就一定身体唔好,所以頸唔好太長。肥人頸應該短,太短就容易有意外,頸短容易有心臟病,心律不正常。
頸圓而方福祿相當,頸細而長貧賤異常。
古書話方主貴氣,頸方就一定頭骨側腦發達,有保護性同進取性,頸圓個人脾氣好,多命長。不論肥瘦,頸幼、過長都好難有好的身体,更加唔會有好環境,搵埋唔夠睇醫生。
如罌如瓶總非吉兆,似鵝似豕恉主不祥。
罌係粗而短,瓶係細而長,又粗又短的叫豬頸,又細又長叫鵝頸,呢度話肥而短同瘦而長,兩樣都唔好的。
頸肉厚實不缺衣實,皮肉瑩潤財雄勢盛。
厚實就係夠粗,同時頸有肉,頸有肉係好難得的,唔露頸筋就係好,後面呢句未必咁,純粹係古書上的誇大之詞。
頸裊而斜性劣多貪,頸瘢不潔性鄙且拙。
頸裊而斜即係裊鳥的頸,左搖右擺,主性格貪婪,但係貪小利而乞人憎。頸瘢,即有班,或毛生上頸背,對爭奪性多數都用唔正當的手段。
瘦人結喉迍邅孤老,肥人結喉刑剋禍殃。
頸幼凸喉核,個人唔夠靈活,同時人緣亦未必咁好,喉核太過凸出未必一定有刑,但係自己身体就多數有問題,呼吸系統的多數。
面如滿月富貴不歇,面起重城早發晚榮。
面圓突起叫滿月,面長凸起叫重城,其實滿月重城都係同一樣,絕對唔係乜新鮮,原來就係對面不見耳,形成外大內小,不見耳就一定要耳貼骨,耳貼骨就一定包括埋耳厚,耳珠有肉。
面帶三拳邊塞之將,面有城廓衣食不錯。
三拳即兩邊地,兩顴骨,兩腮骨都橫起,呢人一定孔武有力,勇猛非凡,多數係武職,佰係奴果女相就太缺乏溫柔之氣,有刑之象,面有城廓即係下巴有條肉包住,好似邵逸夫,如果面長而無廓生咶都幾奔波。
額方者貴,額闊更榮,額隆者吉,額圓者佳。
額方者出身環境好,額闊的人就面面俱圓,至於唔貴,榮唔榮就唔知,額隆即係飽滿,即係官祿宮生得好,一定早行運,額圓就手腕靈活,呢度話方、闊、隆、圓,其實係額頭的其本條件。
額闊而塌中年發達,額仰而平晚歲身榮。
塌即日月角唔夠飽滿,無又蔭就好難少年得志,25歲前都無乜好運,要過眉眼運先至有運行。額仰即係向後斜出,但係重要有下巴相配,如困下巴生得唔好,晚境都無得好,如果有耳珠朝海口,就更兼有權力。
額尖而窄早歲蹇帶,額破且缺壯年波折。
一般來講額尖窄主賤,俗語話:朝中無尖頭宰相(以前的額都當頭),家中無額窄貴婦。額頭窄少年運就無乜好睇,額破且缺一定係好多挫折,同時亦無貴人,但係勝在捱得。
額低骨陷刑愚頑,碩橫骨露兇惡刑親,額塌少年虛花,額突幼歲孤刑。
額低骨陷即係眉骨上面凹陷成坑,係唔會接受別人的意見。額橫骨露即係額骨向前凸出,呢個人一定好反叛,好難教。額塌即係中線低斜,想有一份長久的工都難。額突多數係講前額上半部凸出,如果加上耳缺,表示父母離婚。
頭大額大粗魯愚眛。
頭大額大係指有前無後,後腦尖細的人智慧一定低,有前無後的人一定係志大才疏,如果加上唇薄,講就無敵,做就無力,如果加上眨眼,就更加講無句真。
額尖耳反三嫁未了,額闊頤朝必是英豪。
額尖即係額窄,汗毛多,呢人野蠻,耳反就一定薄,耳厚就好少反的,主個人鐘意攬權,要妻奪夫權,一次婚姻就真係好難到老。額頭廣闊,下頦朝天,英豪就未必有晚福就肯定,古書話晚年出仕。
額闊頤尖迍邅晚年,額窄頤圓困頓初年。
呢度係少年運好,下巴尖晚年就要小心,後生就一定要學專業技能。額窄早年梗係唔好啦,頤位圓就多數得到仔女的助力。
耳厚而大永無顛沛,耳硬上提早歲揚鞭。
耳厚表示祖蔭好,大表示身体好,厚而大就一生都無乜波折。耳硬意志強,耳提高出出名早,如果耳提高而係火形耳的就同母無乜緣份,但係自立性強。
耳薄而軟弄巧反拙,無廓有輪處事無能。
耳仔薄的人鐘意投機,耳仔軟的人鐘意取巧,如果又軟又薄,即係鐘意投機取巧,究竟得唔得就要睇佢當時的流年運。無廓即係好似一隻水,做唔夠穩陣,同時亦都無魄力去兼顧咁多,處事無能就未必,最主要係睇乜事,大件事,最好就唔好搵佢。
兩耳招風破祖離家,兩耳貼腦富貴到老。
兜風耳,如果屋企有錢的就係二世祖,如果屋企無錢的就早離家搵食,祖上得剩番俾佢,係佢地唔,點賴得呢個人呢。兩耳貼,即係對面不見耳,後生的成就會大,因為缺乏個鬥爭性,究竟可唔可以富貴到老就言之過早,因為耳仔係主幼年,同埋一個人的性格。
上夬刑重,下尖創業難。
耳頭尖就係火形耳,一定要配粗而硬的頭髮,如果頭髮幼而軟,就身体有問題,所謂刑就一定係自己身体唔好。下尖即係無耳珠,無耳珠的就助力少,朋友幫都少,父母就更加唔使指意,最主要就係無一種的持久的沖頸,可以幫人發達,因為容易氣餒,缺少屢敗屢戰的精神。
若得垂珠應,早晚定安閒。
有耳珠絕對唔會係安閒的相格,如果垂珠起折,就會好細個就有家庭的變故,唔係老豆就係老母,到晚年耳珠就一定好過無耳珠。
耳溝開闊幼歲頑劣,耳溝細小人人寵愛,耳溝骨反懂事較早。
耳溝開闊量度大,因為生好動,好動的人多數大量,好容易就會唔記得人錯處,頑劣就因為精神充沛。耳溝幼個人就倚賴性強,性格又嗲,但係就懶,做魄力唔夠。骨反即係耳溝短,甚至乎無耳溝,呢人早熟,係思想早熟,太早懂事就一定捱苦多過歎世界。
面大鼻小多為人奴。
鼻細的人主意無乜,堅持力唔夠,獨立性唔夠強,如果加上食指短,就更加有好重的倚賴性,所以多數受人驅使,但係鼻細的人多數忠心,最緊要配一雙靚的眉。
面肥鼻瘦錢財難聚。
鼻瘦即係露骨無肉,亦即係土星無勢。鼻為財星,原因係中國自古以來都係以土為財,有句名言:有土斯有財。土星薄就想剩錢都難,尤其是年上壽上靈骨,一定儲埋一筆就會俾親戚累你唔見。
面橫鼻塌生性兇悍。
面橫即係顴骨橫露,多數都橫蠻無理,鼻塌即係鼻扁,如果鼻高就算野蠻都係擇善固執,如果面橫鼻又塌,就唔只野蠻,仲係好自私,最明顯缺點就係護短,不分是非,亦都無分辨是的能力,但係做大惡事就無膽,只係自己的生活圈裏面蝦蝦霸霸。
鼻圓聳印功名鼎鼎,鼻連眉骨父祖福蔭兄弟友愛。
山根高,直插印堂,就容易得到有力人帶「歇」,一定要鼻頭夠圓,如果鼻頭尖就人緣無咁好。好似做大戲化粧,眉骨隱約由個鼻樑向外伸展,印堂飽滿就一定出身良好,周圍一定有一班幫得手人,未必一定係兄弟,同學朋友都得。
鼻連邊地終成大器,鼻短樑平自創前程。
呢度連並唔係真係由23,24個位置直聳而下,而係感覺到有氣直沖而下,亦即係來龍豐厚,一定事業有成。鼻短一定要人矮,人高鼻短,想有前程就難,樑平就一定係要鼻樑,鼻樑窄就好難有創業魄力。
準豐樑聳家道興隆。
鼻頭有肉,鼻樑又夠高,有白手興家的能力,但係要顴骨相配,如果有鼻無顴,就44歲後就好容易失敗,要在44之前搵夠就根本無可能,如果可以搵得夠就一定唔符合相格,一定有其他部位生得好的。
鼻隆而昂仕宦榮昌,鼻直而厚子貴封侯。
在古時,呢種相格只有做官先至有出路,但係現在唔同晒,有好多權力比官更加大,例如做議員。鼻直而厚又點關仔事呢,簡直亂嗡,唯一可解就係鼻厚就人中都唔會太淺,仔女身体都會好。
鼻如縮囊到老吉昌,鼻如獅子聰明達士。
即係鼻短而大,好似個蒜頭咁樣,呢人好有量度,同後生好容易相處,到都好開心。鼻翼闊而厚,鼻孔又齊,又圓,聰明同時生性樂觀,獅子鼻多數鼻樑夠長而厚,鼻樑薄就唔夠樂觀。
鼻如截筒財祿亨通,鼻如懸膽白手興家。
鼻孔齊而平,就適合做正常收入工,就好少有失業,但係突然間的橫財就少之又少。所謂豬膽鼻,呢種鼻係女人度就好,如果男人有豬膽鼻就氣量淺,同時變能力不足,女人有就旺夫,鼻為夫星,女人小氣都唔緊要。
鼻柱廣長必多伎倆,鼻有損破孤獨饑餓。
鼻樑廣即係闊,闊而長一定魄力好,有足夠的精神体力去學好多野,最緊要就係呢種形格的鼻有上進心,如果鼻樑窄而皮薄,你迫佢去學都好難。破損即係土星受損傷,即係財星受傷,就梗係窮啦,人窮就想唔孤獨都難。
準頭尖小人多賤,孔仰家無隔宿糧。
準頭尖就主個人有原則,樣樣都依照規距做,無乜人情味可言,呢度尖小係話薄而見骨,凡鼻尖見骨的人多數忘恩寡恩。朝天鼻使錢無節制,尤其是流年部位有破損,就一定無端端耗費大量積畜,如果行正鼻運就要睇鼻翼厚定薄,先至決定當時的運氣點。
年壽高明無災有慶,雙座光澤夫唱婦隨。
年壽高明無災就未必,就要睇皮薄抑或厚,高明即係羅馬鼻,表示有進取性,慶即係好事,有進取心梗係好啦。雙座即係夫妻座,夫妻座範圍由42,43至到年上壽上呢個位,如果無烏黑無灰暗,一定夫妻和諧。
金匱依禁房錢財滿庫,子宮傍夫座福祿駢臻。
金匱即係鼻翼,依禁房即係鼻翼同面部無起坑,接口、界線好平滑,就好多積畜。子宮即係眼肚,子女宮,傍即係傍住,夫座即係勾陳位,子女宮生得靚而又見到勾陳位飽滿,就有夫福享,呢度係講女人的。
甲匱連準起多財多寶,顴骨入天倉有權有勢。
甲匱即係鼻翼,同上句金而成金甲位,連準即係鼻翼位同鼻頭之間無一條凹線。入天倉即係顴插天倉,有權就多數,有勢就未必。
鼻隆顴拱自助人助,顴高鼻塌多成多敗。
首先一定要自助,顴拱表示有奮鬥心,鼻頭圓就有人緣,所以自助之後就有人助。鼻塌未必一定鼻形有問題,有厚顴埋鼻的形格,呢個人無乜主意,成功的機會就少,多敗亦未必。
顴高頤削作事難明晚歲伶仃,獨顴無面中年破敗子散妻離。
顴高頤削即係牙較骨薄,貪婪,太過現實,有利就六親不認,晚年孤獨係正常。顴骨過高,面削,呢度係顴高壓目而面又薄削,再加鼻樑尖削。
顴露顴尖破財中年,顴面低窊孤獨無家。
顴骨露,皮薄,破財就未必,但係一定招惹好多是非,最主要係口舌是非。顴面低羽,即係顴骨位置生得高,成為顴壓目,而面珠凹陷,性格孤獨人緣差,到老想唔孤獨都難,無家就未必。
頦方且圓晚年福祿,頦尖而矯有子不孝。
由字面晚年安穩,要有福祿一定要飽滿,地閣方未必夠圓,圓又未必係方,淨係圓即係有肉無骨,所以有人係唔可以瘦,瘦親就環境轉壞。下巴尖福薄,矯即係尖而向出,凡尖一定肉薄,唔可以有仔女在身邊,仔女對自己好唔好就要睇子女宮,如果子女宮結實,仔女多數會留自己身邊。
頦短且縮晚歲淒涼終不祿,頦尖而長一生貧苦又無良。
下巴短人就多數性急,縮即係「巢」皮,凡親巢皮一定缺乏實行能力,亦都缺乏堅忍能力,咁相想晚境好都難。下巴尖而長性格多輕挑,尖就一定無肉,即係無積畜,一生貧苦又未必,無良唔係,有無良心絕對唔係下巴尖唔尖而定的,係有無鼻油而缺定,或者好似勾踐。
頭圓足方真富貴。
呢個圓唔單止額頭圓,重要頭蓋骨圓先至合格,叫做真圓。頭圓取象為天,足方取象為地,足方唔係隻腳四方,而係腳板底厚。頭又夠圓,腳板底又有肉,天地俱備,就天生好命,富唔富貴就要睇埋其他部位。
頭尖足薄定貧窮。
頭尖即係額頭尖,額頭尖即係額窄,額窄就少年運差,但係如果加上天靈蓋尖就唔同,天靈蓋尖就算額窄都可以逢凶化吉。足薄即係腳板底無肉,腳板底無肉就一定係腸胃多病,腳瘦同薄唔同,腳瘦即係腳面瘦,腳面廋就一定係際遇唔好。
頭大口小貧苦早了。
頭大就要眼大口大,如果頭大口細就交際手腕唔夠靈活,所謂口大食四方,食四方者即係人緣好,男人出外搵食一係就鼻頭有肉,一係就口大,如果兩樣都缺乏,就打工好過做生意。
顴高倉陷有顴無權。
倉即係天倉,顴高唔單止要有面,重要天倉飽滿,如果淨係得顴高,又無面又無顴,就不過係假權,屋企可以大聲夾無準,但係出到街就無聲出。
頦骨連頤晚福可期。
  頦骨連頤即係下巴方圓,下巴方圓有肉梗係有晚福啦。
頦尖頤削到老苦作。
呢度同上句就相反,兩邊腮骨削,下巴尖想有福都難,唔使等到老。有呢相一定要有專業技能,否則真係到老苦作,作即係技藝。
頦骨連腮呼喚成堆。
頦骨連腮下巴連腮骨,但係又未至於耳後見腮,表示子女成群,唔係伙記多。
長如茅立破祖離家,短如豕蹲頑劣多凶。
身大瘦、高、茅立即係企得直,呢度講無蘿柚,一定早離家搵食。豕蹲即係豬,肥而行動遲緩,就一定性格頑劣,亦都唔會太長命。
體大骨秀名滿宇內,體小骨秀不富便貴。
秀即係唔露節,身体高大而有肉包住,會有名氣,身瘦而膊頭有肉,多數都係有錢人,而且可以長久。
胸闊而平豪邁絕倫,胸平而窄難當重任。
胸闊而平首先要膊頭夠橫,呢人有義氣,膊頭橫就可以承擔重要責任。胸平而窄就一定係膊頭唔夠橫闊,所以唔可以擔當重任。
胸闊厚實富而好施,胸寬露骨破敗落寞。
胸闊幾時都係好,厚實其實係背脊,背脊厚就一定有福,好施就係心地好。胸闊露骨,有胸無背,背脊露骨就福薄,都好難有真正朋友。
上露下陷孤苦到老,上下皆陷奸貪枉法。
上露下陷就係雞胸狗肚,雞胸向外凸,狗肚向裏面縮,呢格第一身体差,第二就缺乏堅忍力,第三無容人之量。即係上下成坑,瘦而露鎖骨,肋骨露坑,枉法就未必,貪小便宜,惊蝕底就真。
胸闊而促生性狠毒,胸凸而挺生性愚蠢。
促即係短,即係腰短,腰短的人多數勤力,富於進取,如果腰短而背薄,富於爭取性但屬於不擇手段類。淨係雞胸,缺乏爭取性,愚蠢就未必。
婦人胸寬賢淑端莊,男人心陷作事見小。
不論男女都以胸闊為好,所謂胸衿廣闊係真,胸窄氣量一定淺,但係胸闊背脊一定要有肉,如果背脊無肉,樣樣睇唔開,胸骨窄,個人小器做唔似男人,形。
胸長不直有才無德,胸短不平為富不仁。
即係寒背,寒背就算有才幹都無魄力,呢個德係解能力。胸短即係腰短,腰短就一定有進取性,短而凸露,為富不仁就未必,手段可能差。
背若屏風福子孫,背若負龜必有施為。
  背若屏風即係闊,闊就係顧家。負龜即係厚,背脊厚就梗係有福啦。
背如負物邊陲將帥,背如團扇現成基業。
背如負物即係步履穩重,俾人有一種安全感,可以重責,並不限於邊陲帥。背如團扇即係膊闊腰窄,有父蔭,守唔守得住就要睇其他部位,例如有無羅柚。
背部偏斜絕嗣貧夭,背部薄窄不貧則折。
偏斜即係脊骨歪,脊骨有問題就想生仔梗係難,貧夭就未必。薄窄就一定肺弱,貧就未必,容易有肺,以前有呢病就實死梗。
兩肩平闊衣食不缺,肩窄下垂毫無作為。
膊頭平闊就一定有魄力,自食其力,唔鐘意靠屋企。肩下垂唔緊要,最忌鴛鴦,左右唔平衡,如果唔平衡就行路左搖右擺,達唔到行如風,立如松要求,得唔到人地信任。
兩肩上聳所發不久,肩聳肩寒老無一椽。
兩肩上聳,叫做膊頭高過耳,唔可以將自己的成果長久保持,就算係火形人都唔可以長期保持長久。寒即係露骨,凡膊頭露骨多數都老來無得倚靠。
右肩低左肩高白手興家,左肩低右肩高別祖離家。
呢度屬於盡信書不如無書,相裏面凡有高低都係唔好,點會話白手興家,簡直攪笑。
臀圓骨開諸事亨通,女人臀大反為下賤。
臀圓即係蘿柚有肉,無論男女都要有肉先至好,無肉就係空心老官,女的夫妻運都唔好。骨開即係盤骨闊,就唔會壓迫腰部,腎機能好,尤其是女人生養容易。臀大一定係反常的大,唔單止蘿柚,任何反常都係唔好。
小兒無臀災厄頻仍,縱然乖巧能言而亡。
細路仔無蘿柚就係身体差,亦表示老豆唔叻,但係如果鼻頭夠圓就會好,如果鼻薄就認真差。
少年無臀百事無成,田園不守破祖離宗。
無蘿柚無論乜年紀都係差,少年就續書好難有成就,同時亦好難有祖業,有都守唔住。
中年無臀破祖飄零,刑妻子奔走紅塵。
如果少年有蘿柚,而到中年反而無蘿柚話,身体一定有問題,如果到中年都重未有蘿柚話,就算有祖業都守唔住,成日不停奔走,居住的地方亦唔安定,老婆仔女跟住佢想唔刑都唔得,性格又唔合群,人緣好極有限。
老年無臀刷鍋洗盆,無依無靠孤獨終身。
如果中年無蘿柚,晚年亦一定唔會有,都唔慌有積畜,什工都要做,洗鍋刷盆呢工唔慌會高級,蘿柚無肉晚年就一定孤獨,獨身就未必,最主要係無積畜,如果加上無腳瓜「朗」,就真係獨身居多。
肥人無臀多學小成,半生無運四九歸冥。
肥人無蘿柚,即係空心佬倌,點樣勤力都唔會有成就,唔係多學小成,係根本唔肯學野,但係可以後天補救。四九歸冥係話36歲有大劫,呢係講好肥種。
瘦人無臀四處奔波,縱有小就終無一成。
瘦人無蘿柚就一生勞碌,想優悠生活就好難,但係如果瘦人有曲線就多數好命,亦都可以有積畜。縱有小就係講中年的瘦人後天就容易,但係過中年就好難再有機會。
身長無臀木屐無釘,身矮無臀孑然一身,若還尖矯不免輕佻。
身長係腰長,腰長蘿細容易跌倒失敗,腰長都一定懶,腰長加上無蘿就容易氣餒,有小小挫折就容易自暴自棄。腰短人就勤力,腰短而無蘿人性格自私,人緣差,呢度話孑然一身並唔係話無老婆或者無老公咁解,只不過係朋友少。若還尖矯,唔係蘿柚凸起,較為難以觀察,呢個蘿柚尖係要低先至見到,一般行路或者坐低係見唔到,有呢種形格的大事就一定退縮,表面係睇唔到。
面長身短中年發跡,面短身長衣食奔忙。
面長中停長,中停代表中年,40至55歲,身短腰短,腰短勤力,肯搏,就算無其他特別好相好部位,到中年都一定有好環境。身長懶,面短反覆,兩樣夾埋就屬於見異思遷,唔守本份,多數都一事無成。
面瘦掌方孤苦淒涼,面短掌圓衣食自然。
面瘦屬木形,掌方屬金形,思想同行動唔協調,木形屬思想形,金形屬行動形,面瘦掌方形成思慮過多,諗多過做,好難有成功機會。凡面短人好動,掌圓屬水面短帶圓屬水,有動意欲,兼且人緣好,又肯勤力,所以衣食好,同時面方圓人食祿倉好少薄的。
身長腳短富貴可斷,身短腳長貧無住場。
身長腳短有個花名,叫做矮腳雞,性格善於爭取,識得把握機會,富貴就未必,但係生活無憂就肯定。身短即係腰短,本來係勤力的,但係如果腳特別長,呢個腳長係指小腿特長,小腿特長即係無腳瓜「朗」,凡無腳瓜朗無論做或居處,都好難安定。
兩手白潤富貴前定,兩手粗黑謀生乏術。
兩手白潤即係皮膚幼細,毛孔細,手背皮厚,表示出身環境好,可唔可以一生富貴就要睇埋其他部位。手背根露想唔克都唔得,呢度話謀生乏術唔,手背露根多數有一技之長,但係毛孔粗就算有技術都係好辛苦技能,例如打石技能或者搬運能,如果毛孔細就可能係修理鐘錶技工。
手軟如綿衣食兩全,手如乾薑家道必昌。
手軟如綿就一定要多肉,如果手軟而薄就一定從事唔正當的職業,女人手薄就福薄,呢個福係指夫緣。手如乾薑係女人專有,另人極之少,乾薑即係手皮粗硬,呢女人鐘意做家務,同時一定有潔僻,握手的時候感覺好似柴皮咁樣,就係呢種人。
臂如捆布不貴便富,臂中肉拱苦作有種。
捆布即係圓,手臂有圓有扁兩種,手臂圓表示發育良好,身体好,同富貴有乜關係?臂係指上臂,上臂連膊頭,膊頭厚就一定福緣厚,膊頭薄就表示搵到都剩唔到,剩得到都好辛苦。臂有拱肉即係手瓜起,以前多數係苦力先至有,但係現在就視之為健美,因為現在職業已經再無貴賤之分,有種即係天生,以前人重文輕武,都唔用腦稔,無体力努動的人又點會有屋住呢。
臂圓而長衣食相當,臂細下尖衣食難言。
臂圓即係上臂豐滿,見肉唔見骨,有咁臂骨一定膊頭有肉,又背脊有肉,衣食自然好。臂細下尖即係手較骨大,一定係身体唔好,手瓜幼一定肺量細,呢度同貧富無關,亦都同出生環境無關。
肘短而圓衣食自然,肘長而扁貧窮難免。
肘係前臂,前臂短係自然之相,正常相係身長過臂,臂長過肘,肘長過掌,掌長過指,如果其中有一樣唔對稱,呢個人一定辛苦,最常見就係手指長過手掌,多數辛勞搵食,呢度話肘長而扁就係長過臂,一定辛勞搵食,貧窮就未必。
肘短而直不愁衣食,肘長瘦尖貧苦顛連。
呢度肘短而直係以前讀書人特質,表示唔使勞力搵食,以前的人唔崇尚運動,對手瓜起視為賤役,根本唔知道係身体健康的象徵,所以後來俾人譏笑為東亞病夫。肘長過臂,加上尖瘦,手掌較骨大,一定手背露筋,手背薄就一定出身環境差,但係唔代表一世窮。
腕秀而方珠玉滿箱,腕正而圓衣食眼前。
秀係唔露骨,方而有肉夠軟係好少,多數都係手軟而長形,方形好少。如果手方形但係又硬多,所以方而軟係好少,手掌長而軟人無自制力,手掌方而軟人有決斷力,有掌權能力。腕正而圓係近手頸線,呢度肉厚就一定有父蔭,所以話衣食眼前,但係身形肥胖就唔會有父蔭,好似肥肥個女,一出世就無父蔭。
腕粗骨露一生苦作,腕邊起墳告貸無門。
腕粗骨露一定配王字面,性格一定頑固,重有一樣缺點就係顧多唔顧內,唔係勞苦大眾都係餐搵餐食之人。腕邊起墳一定配鼻樑薄而起節,俾人一種信唔過感覺,有困難時候好難有人幫你。
掌背厚如龜福祿皆可推,掌心窩如碗倉豐庫亦滿。
掌背厚唔見筋,已經係有福之人,根本唔便厚如龜。掌心如窩有錢剩,剩得辛苦抑或舒服就要睇手背厚定薄。
掌厚骨軟幸福不淺,掌粗骨硬橫蠻任性。
呢度係講女人,掌要厚,就男女都的,但係骨軟男人就無咁好,手骨太軟就主倚賴性強,女人就無所謂,男人就梗係唔得啦,女人有呢掌就樣樣都唔使操勞,有福之人。掌粗係講手皮粗,女人手皮粗表示呢個人有主意,以前人唔鐘意女人有主意的,所以話橫蠻,骨硬有行動性無倚賴性,唔使等人地同意而自己去做,所以橫蠻加任性。
手掌常溫無求於人,手掌常冷時多困境。
手掌常保持溫暖,第一身体正常,第二心境平常,唔會太過緊張,亦唔會急燥,做程序安排得好有條理。手掌冷熱無常,表示呢個人情緒好唔穩定,運程起落不定,好一陣,跟住又行衰運。
掌軟如綿快樂一生,粗硬露筋苦作辛勤。
呢度軟如綿係包括埋手指骨節,手指背節紋不露,表示做少波折,手指背越多皺紋,就越係要親力親為。有紋都唔止仲露埋筋,想做唔辛苦都好難,仲要好勤力先至夠生活。
不熱常汗心苦自敗,掌滑如苔事業堪誇。
手汗大表示心情緊張,自信心不足,做事患得患失,多數成少敗多,但係如果天氣熱有手汗係正常。手皮滑表示做事有毅力,最緊要就係唔容易氣餒,所以成功機會就一定大。
十指端正一生順境,十指尖長家有儲糧。
十指端正,正確係手指夠直,手指直無論係自己做或係合作都好順利,如果加上唔露骨節,就更加優勝。十指尖長一定要好似筍形,手指如竹筍,就一定出於富貴之家,就算唔係出生於有錢之家都好容易教。
指柔而密財恒自給,歪枯連皮孤獨無依。
手指罅疏就使錢無節制,密就自制能力。手指與手指之間皮生得高,同時亦都皺皮,性格極度孤獨,老而無依唔出奇。
指禿短生性愚魯,指硬而疏衣食難周。
手指長就聰明,手指短就缺乏好奇心,如果短而掘,判斷力唔夠而又唔肯接受人地意見,愚魯就要睇埋額頭夠唔夠高。指硬而疏就一定係際遇唔好,俗語話雞爪形,生活一定困難。手指抑即手指向後彎,古書上面稱為「反元」,主六親無靠就一定係大姆指向後彎得好利害,但亦都主容易得橫財。食指後彎主好虛榮,為人唔實際。中指後彎貪玩而不務正業,成日轉工,但係手指夠長就可以減少缺點,最忌向後彎而短。如果淨係左手係咁,到中年就會改變,如果左右手都係咁,就到老性格都唔會改善。指尖扁唔適宜早當家,更加唔適宜早婚,因為25歲前運氣都唔好,同時亦唔識理財。手指短,手指唔適宜太短,尤其係尾指,尾指短除代表疑心大之外,如果短過姆指重更加表示呢個人係奸,而且屬於奸詐多計。手指硬多勞碌,會同親人有隔膜,年紀越大,同親人隔膜亦都越大。手指頭掘就做唔到精細的工藝。手指歪斜-食指歪自信心強,能吃苦,中指歪表示容易睇人唔起,生性傲慢,無名指歪任性而為。做唔顧後果,尾指歪主仔女唔聲話。大姆指歪係最唔好,表示做唔夠魄力,遇困難容易退縮,屬於無事牙擦擦,有事刮刮。指逢疏除對金錢觀念弱之外,亦主六親無助。上端疏主唔聚財,指根疏主無情,指有節多數工作辛勞。
手長過膝興創事業。
呢屬於奇相,凡親奇相就一定要在亂世先至有機會,太平盛世就唔會有出頭機會,睇歷史就可以証明。
手短腳長性行不良。
手短腳長無論肥定瘦都有兩個缺點,一就係無腳瓜,二就係無蘿柚,無呢兩樣,個人想好都難,其實唔關手短事。
胸寬背厚光前裕後。
胸寬主才智,千祈唔好窄,所謂心胸廣闊,背厚重緊要,背脊厚就福澤厚,土形人多數有呢形格,屬於平凡人一個,但係如果木形人有呢種形格就一定有好成就,一定超過前人,亦都有能力福蔭後人。
胸凸背凹勞苦早卒。
胸凸即係雞胸,背凹即係脊骨成坑,兩樣加埋就係腩部有問題,勞苦就未必,但係短命就好難避免。
前仰後俯邦國之輔。
在前面望個胸好挺,在後面望背脊好厚,成前仰後合之格,呢人做有沖勁,性格又穩健,如果一個機構有呢人一定發展得快而又作風誠實,好似中個領導人有個都係咁。
背寬胸厚富貴長久。
背寬做就有當,胸厚就心地好,背脊厚為中忠誠,加上心地好,一定好早行運,做腳踏實地,唔會冒險,所以生活就算唔係大富亦都平穩。
有背無胸晚年孤貧。
有背即係背脊無坑,唔會係厚,無胸即係陷,胸陷就器量淺,至於晚年孤貧,就要睇埋地閣位好唔好先至決定。
雞胸鴨背多非善類。
雞胸即係凸而露骨,鴨背即係薄,背薄做事就唔夠踏實,胸凸就唔同豐厚,厚就心地好,凸而露骨就相反,樣樣都唔順超,所以話多非善類。
狗肚雞胸狠毒深沉。
狗肚即係窄小而凹,又叫蜂腰,腰窄一定要配闊肩,如果肩又窄,心性唔平衡,無容人之量。
弓背蜂腰過路拆橋。
弓背即係「頭佬」,蜂腰即係無肚腩,頭而腰細,專係度橋,就算損人而不利己都覺得好過穩,但係頭而有肚腩一樣係算死早,但係就一定要對自己有利先至肯做,凡頭人都無所謂義氣,只有利字當頭,所以對呢種人只能夠動之以利,切勿以為感情交情對呢種人有用。
鱉背龜胸好色貧窮。
龜背係有福的象徵,但係龜胸就唔好,平而露骨,呢樣唔可以判斷為好色。鱉背亦即係平而扁,有呢咁樣的形格想唔窮都難,至於好色與否就未必。
肩寒背削資財耗盡。
寒即係薄,膊頭見骨就無論搵幾多都係多餘,因為一定有無無謂謂令佢使晒錢,好似梅艷芳,凡膊頭見骨好難背脊有肉,想有積聚都難。
肩闊臀寬到老無波。
膊頭闊就有當,肯承責任,臀闊就有後福,一生都無負於人,亦即代表人緣好,到老無潻係正常。
腿長圓肥衣食俱全,短圓粗貧賤多憂。
腿係大脾,腳同手係一樣,都要一截長一截短,大脾長過小腿係先決條件,圓而肥亦都係最基本,因為大脾肥就蘿柚多數有肉,衣食就一定唔差。同樣係夠圓有肉但係大脾短過小腿就問題大,貧賤就唔,但係多憂就一定,因為小腿長過大脾就一定做不分輕重,如果加上額頭低就一定是非不分。
腿大長圓智大福厚,短若細瘦勞碌奔走。
腿大加長又圓福厚就可信,智大就未必,大脾夠長就表示性格溫良,所謂賢。短己經唔好,重要瘦,做就唔慌叻,唔使講就一定勞碌奔走。有一個好難聽的名,叫狗腿,狗腿就一定係大脾瘦而短,人腳攪到狗腳梗係唔慌好啦。
膝圓而大無災無害,膝露而尖官訟連年。
膝圓即係有肉,膝頭有肉就一定有大脾有肉,大脾有肉就蘿柚有肉,就一世夠運。膝頭哥露骨就一世都唔夠運,身体亦差,正式係膝頭大過脾,想好都難。
膝圓方藏富貴異常,膝骨尖露必遭牢獄。
呢句同上一句大同小異,藏即係肉厚,富貴異常就真係誇大。膝尖露骨就容易招惹是非,有無牢獄之災就要睇其他部位,例如生命線有無方格。
脛前骨生稜角,脛中骨如刀背,命運不由人常遭小人妒。
脛即係小腿,脛前骨即係膝頭對落,將個膝頭屈埋就見到。正常應該係圓或者平,如果有凸出就唔合格,自主性唔夠強。脛中即係上下五寸,原則上任何一條骨都要圓而好似竹咁先至合格,但係小腿骨就有分別,小腿骨就有係扁形,摸落去就好似刀背脊咁樣,呢個人就會好辛苦,一樣會招惹好多是非。
小腿圓直豐衣足食,小腿不圓衣食難全。
上面話脛骨扁就勞碌,呢度話脛骨圓就有好環境,因為骨圓多數有肉,如果皮包骨就想好都難。
脛向前矯好吃懶做,脛向內彎大言不慚。
呢度脛向前即係腳向外彎,同向內彎係一樣,小腿唔夠直就一定性格上有缺點,唔係懶散就係鐘意誇大,呢兩句分開精細,因為向內彎人多,呢個世界作大人多。
脛如竹杖貧賤不良,脛如瓠瓜生性愚蠢。
脛如竹杖就係無腳瓜朗,好似支竹咁樣,想搵到食都好難,不良就未必,以前人寫書通常都將貧同賤拉埋一齊,其實貧同賤係絕對唔同的。脛如瓠瓜,最貼切就係水瓜,兩頭細中間大,呢腳形就一定配一雙鴨腳,呢人智力就低,如果加上眉壓目就更加肯定唔會有高職位,有呢腳形多數都係由面,後生時一定辛苦。
腳背厚方富甲一,腳下容龜富貴可推。
腳背同手背一樣,最好就唔露筋,手背主先天性,即係出生環境,年幼時家境,腳背主後天際遇。腳背有肉「肥嘟嘟」就多貴人,如果手掌有貴人線出現表示佢現在所謀事一定好順利。腳下容龜即係腳掌個窩好大,腳窩大表示有父蔭,呢個位好唔好就一定要會行先至睇得準,BB仔太細係睇唔準的,所謂富貴可推即係老豆剩番好多俾佢。
腳背有肉現成福祿,腳心有肉堆金積玉。
腳背有肉就際遇好,貴人又多,腳背會跟年歲而改變,可厚亦可薄。腳心即係腳掌位置,腳掌有肉就彈力好,行路姿勢唔會搖擺。俾人一種好穩定的感覺,如果加上背脊厚就想窮都難。
腳背無肉不賸一錢,腳背平薄貧窮之輩。
腳背見晒腳指骨,好似雞爪咁樣,想剩錢都難,最主要係晚年無積蓄。腳背平薄即係皮薄,露筋就好難身居高位,亦都搵唔到錢,唔好講有無得剩,搵到至講。
腳小背厚不富則貴,腳大且橫不免貧窮。
如果係土形或金形人就唔可以腳小,因為土形人身形多數厚實,金形人多數骨架粗,所以呢兩形人腳小就唔對稱,亦都唔會富貴,其他水、木、火形就可以容許腳細,都有富貴機會。腳大且橫即係腳板闊,腳以長形為貴,如果向橫發展,呢個人屬於四肢發達,頭腦簡單之輩,想唔窮都難,一定從事体力勞動職業,亦都多數係王字面形人,有一個好處就係身体夠強壯。
五趾纖長必定賢良,五趾端正豪萬成性。
腳趾長有一個特點,就係容易諒他人的過失,如果長而有肉就原諒佢,而佢會記得你,如果長而露骨,就算你對人點好都無用,例如借錢出去通常都無得還。五趾端正即係唔丫開,隻隻拍得好埋,表示呢個人好通情達理,如果加上鼻頭有肉,呢個一定係善長人翁。
 楼主| 发表于 2011-1-21 01:03:17 | 显示全部楼层
中趾長圓絕處逢生,趾短而禿一生苦作。
呢度中趾即係二趾,通常話二趾長過公,唔死一世窮,其實唔,二趾長人一定捱得,至於窮唔窮就要睇佢腳有無露筋,如果腳背見筋,捱得,但係搵唔到錢。呢度話長圓可以絕處逢生,唔使講梗係有肉。腳趾短無問題,最忌就係禿,禿即係掘,本來腳趾就唔會尖,但係呢度掘係頭大尾細,變成掘都唔止,重要腳趾罅疏,,就最差,一世都辛勞,呢個辛勞唔係一定体力的。
大趾短圓父母俱全,大趾長尖自身顛連。
我睇人有無福就一定先睇腳趾公,如果腳趾公好肥好厚,唔使講,呢個人一定好福氣,如果係男人就一定和藹心地好,做著佢伙記一定好好福利,如果係女人,唔使睇都知道有一個靚鼻,即係一定旺夫,但係有個靚鼻未必會有一隻靚腳趾公,呢就只係自己做叻,唔一定會旺夫。腳趾公長短唔緊要,最差就係尖或者扁,腳趾公尖就辛苦,好難有一份「印印腳」工,腳趾公扁即係薄,就際遇唔好,如果扁而腳指甲生前,就更加一世無運行,正式輪到你都唔到你。
粗短起節性情頑劣,曲折歪斜無惡不作。
粗短起節就唔限於腳趾公,其他腳趾都係咁睇,凡親起節露罅細路都係難教,至於曲折歪斜無惡不作就未必,但係貪心就真,既然貪心就一定自尊心都差。
脛黑且瘦衣食奔走,脛白而圓風光眼前。
小腿黑白就一定要睇全身皮膚,如果小腿特別黑,即係當時的腳頭唔好,好容易俾同事譏為「陀衰家」,瘦即係小腿無肚,無腳瓜朗,就搵到食都搵唔到著,梗係奔走狼忙。無腳瓜朗而見肉色白潤,其實亦唔係好現象,只係代表當時小小好環境,一陣好過之後又回復番唔夠食,餐餐清的局面。
細如鶴腳不貧則賤,粗如瓠瓜先苦後甜。
細即係幼,唔單止無腳肚,重好似一支竹咁樣,又直又幼,身体又唔好,際遇又唔好,貧就肯定,賤就未必。粗如胡瓜有呢腳形就多數都有一副由字面,初年就運氣差,但係晚年就有福享,呢種腳形女人多,另人就較為少。
腿大膝圓如斗一生不到公庭。
大脾有肉,膝頭又圓表示一生做穩陣,個人修養好,處處容忍,所以惹官非機會少好多,呢度話斗咁大,只不過係形容詞。
腿瘦脛細如杖為人下賤不良。
大脾瘦又無腳瓜,得個膝頭,正式係膝頭大過脾,下賤不良就言過其實,身体唔好就一定。
腿瘦膝尖常招官訟。
大脾瘦就福薄,上身肥而下身瘦想有福都難,膝頭尖就係波蘿蓋細,膝蓋骨細就呈尖形,唔係真尖,無人個膝頭會尖,有呢形人成日都無端端招惹是非。
腿膝皆小貧窮難了。
腿膝皆小係指比例唔正常,如果人矮就要短,人高就一定要長,如果人高腳短,即係腰長腳短,呢個人的奮鬥心一定唔夠強,一遇挫折就容易氣餒,缺乏一種屢敗屢戰精神,所以話貧窮難了,即係好難斬斷窮根。
輔角插邊庭名揚四海,內府連高廣身躋朝班。
輔角即係21、22部位,插邊庭即係同23、24部位相連,並唔係伶伶仃仃一舊骨起,而係有一度氣隱約相連,呢度輔角連邊地,後生容易出名,如果讀緊書都會做到學生會會長。高廣的位置係中正側邊,內府係火星側邊,呢位相連就主有高職位,呢部位係好細微的。
邊地四起五十亨通,輔骨隆高三九居官。
前面話輔角插邊,即係相連,呢度淨係兩邊地,兩輔骨各自有起伏之勢,困為並無相連,所以勢唔夠大,形成額有凹凸,所以行運就遲,五十亨通其實就話根本無運行,要睇額運一定係年青人,話五十行運簡直就係擾笑,好過話你無運行。輔骨高隆即眉中間對上位置,同輔角唔同輔骨高一定連帶左右丘陵飽滿,所以話三九居官,即係27歲就可以有成就。
天庭上連左廂官居極品,日月角聳天非庸凡相。
天庭上連左廂,天庭即係天中位置,上連左廂,其實係天庭左右兩個位,一個係高明,一個係高廣,天庭同呢兩個位相連,就係天庭飽滿由來,官居極品就未必,但係出身好就肯定。日月角聳天庭即係天庭飽滿範圍更加大,額頭平滿的位更大,形成天庭廣闊,一定唔會係普通人。
天府房心看宦途名利皆可問,戰堂驛馬如立壁忠義不須疑。
天府即上二府,上二府即係理財性,房心係包括埋眉尾與髮尖距離,呢個位闊同埋財性飽滿表示個額一定唔會窄,有呢先決條件就可求名求利。戰堂即係前額,額如壁立就一定忠心,唔一定係對某一個人忠心,或者對集團、黨、國家忠心,亦都代表對自己所做,行業忠心,唔輕易放棄,加上驛馬亦夠直,表不就算離開佢公司都唔會出賣以前公司,加上口形靚,就好有口德。
司空額角如立壁為社稷之臣,上少府豐俱隆應徵賢之認。
司空即係22歲位置,同額角位置,壁立即係飽滿,多數都係做政府工,而且可以做到退休機會好大。上即係29、30,少府即係眉山上面位置,山林位加上眉角上面相連飽滿,多數都係社會上面首長,社會上面社團首長,亦都表示呢個人愛出名,但係唔會太孤寒。
司空平滿神光藏,日月豐隆驛馬肥。
司空22歲,在面部正中第四個位,有骨起而隱隱約約有光就係最好,就算唔飽滿都要平滿,平正,唔可以有紋破,如果有唔好色主有突變事件。日月即係日月角,在眉頭之上,豐隆唔係見骨,加上驛馬位高,代表呢個人有父蔭,少年得志,主出外留學。
雙林豐滿多逸樂,邊地骨起足威權。
雙林係29、30,左右山林、眉角上方,又叫福堂,又叫驛馬,於十二宮之中係遷移宮,呢個位豐滿無破,主能夠安居,唔使成日搬屋。邊地即係邊城,23、24,左右邊城,即係山林外邊兩側,有骨起顯貴,好容易升職,多數係武職,如果色澤明黃,主遠行有利。
中正聳額官高祿厚,龍角插天輔弼良臣。
中正在前額正中部位第五位,司空位下面,印堂上面,在十二宮之中叫官祿宮,所以特別重要,人一生事業都係呢度表現出,呢個位飽滿就容易身居高位,但係凹陷再加上有點,做就必定多挫折,有班痕破紋,容易若官非。龍角即係天庭19歲,18、17歲的總稱,呢三個部位合而為一,隱隱約約見有條氣向髮腳位上升,就叫做龍角骨起,如果色明潤,就一定身居高位而順利,如果顏色灰暗,就算身居高位都容易俾人篤背脊。
虎眉凸起連牛角社稷無危,輔骨巍峨向懸角山川永固。
虎眉連牛角即係眉骨連日月角,似牛角就係向頭頂直沖而上,有呢形格一定係武將,相傳明末名將袁崇煥就有呢種相格,後來崇禎佢殺,明朝就跟住亡。係講左古邊城位置有棋紋相連而無破,就一定身居武職,如果高職就一定邊城骨凸起,而又有棋紋相連,如果只係有骨起而無紋相連,就只係武職,唔會係高職。
福堂橫連太陽穴中貴早發,華蓋橫入後腦骨小貴亦榮。
古書上面一個位置有好多唔同名,呢度福堂即係左右山林,29、30部位,如果同太陽穴相連就主少年發跡,貴就未必,一定要睇埋中正位。華蓋在29、30位置後面,一般都係俾頭髮遮住,有頭髮脫落就容易見到,有條骨伸向後腦,呢人好夠,可能係做賊都唔定,所以重要睇埋個鼻夠唔夠直。
印闊顴開福祿堪誇,雙中豐滿慧性可羨。
印堂在面部中央,山根之上,兩眉中間,亦叫明堂,在十二宮之中叫做命宮,係人元氣精神凝聚部位,亦都係腦髓位置,道家特注重呢個位置,叫做上丹田,呢個位寬闊飽滿,顴開即係有肉面闊,通常都較為夠運。雙中即係16天中,25中正,豐滿,在細路期已經好聰明,但係大之後聰明與否就要睇印堂位夠唔夠豐滿,無論點,細細個時候都好得人鐘意。
根印太窄子晚妻遲,懸邊昏沉人亡家破。
根印即係山根印堂,太窄表示器量淺,加上眉心窄代表無貴人,同埋人緣唔好,性格唔夠開朗,結交朋友機會就會小,結婚遲,生仔遲就係正常。懸邊即係29、30、28三個部位,在額上成倒三角形,換句話講即係額頭黑,家破人亡就未必,但係都衰到好緊要。
刑印光明訟厄永絕,嬪奸暗慘妻妾煩憂。
刑,係刑獄位,在印堂兩邊,眉頭位置,印,就印堂,呢兩個位明亮就唔會有官司,一望埋去成個位好明亮,唔使講話無官司,當時重好好運添。嬪門在奸門上指位,表屋企裏面女人,奸門代表妻子,如果係女人奸門上隻手指位,就代表屋企裏面男人,奸門代表丈夫,呢兩個位灰暗就代表屋企裏面男人或者女性令到自己好煩惱。
魚尾拂天倉貴而且壽,奸門平眉骨財祿兩全。
眼尾向上,或者魚尾紋向上,眼尾上彎,表示呢個人性格好開朗,魚尾紋向上,直達天倉位,呢個人行為好正派,但係要向下紋短過向上紋,或者小過向上,如果長過或者多過就性格同行為都有問題。奸門平眉骨即奸門飽滿,奸門飽滿必得賢內之助,即係話得到異性助力,通常都當作得到妻子助力,其實呢個位係無分男女。
山根見伏犀青雲直上,天井接天倉財祿同探。
山根見伏犀即係鼻樑位隱約有一條氣向上沖,表示呢個人際遇好好,做職位好高,又不斷有好機會。天井位在天倉後面近髮際位置,天倉係埋財位,淨係理財位平滿,只不過係識得管錢,同埋可以將錢養大,但係積唔積到就要睇天井位,亦即係玄武位平滿無破損,表示搵得到同埋剩得到。
灶上屯倉不可空,半生衣祿在其中。
灶上即係鼻孔,屯倉即係鼻孔下面橫肉,俗稱門檻,空即係無條橫肉同埋向下陷,如果係咁樣晚年衣食就會差。如果加上食祿倉薄,就更加身体唔好,如果話成個晚年就言過其實,應該係六十前唔聚財就準確。
準隆樑直人無毒,面肉橫生性必兇。
準:讀音絕,準隆即鼻頭有肉,樑直即係鼻直,鼻又直,鼻頭又有肉,呢個人處事正直,心地又好,但係作為管理人就唔係咁理想,心地太軟,鼻頭尖就有原則,只要唔抑露孔,就唔會偏私。面肉橫生即係顴骨橫露,顴向橫生必定野蠻,如果加上露骨就唔止野蠻,重運惻忍之心都無埋,性格橫蠻無理夾心地唔好。
口闊唇方生來食祿,口小唇薄愛說謊言。
口闊唔係一味大,要有條件,就係口闊要配四方形口,所謂四萬咁口,有呢口形就一生都人緣好,搵食就容易,但係亦都要口唇較為厚。如果口大而薄,講野尖酸克薄,就自然人緣唔好,唔好講話食祿,就連兩餐都有問題。唇薄就口舌招尤,口大就鐘意講,唇薄亦都鐘意講,但係口細而唇薄,講唔負責任,鐘意講大話,如果係女人,就德行都有問題。
十三氣勢分析
第一天中對天岳,左廂內府相連續。
天中即係15歲位,一定要無美人尖,呢個位平表示呢個人性格好通情達理,如果飽滿高起就主少年運好,少年運好唔好,呢個位係先決條件,最緊要就係唔好後斜,呢個位置越飽滿就越多人提,有同埋有「啦」都差。天岳又叫刑獄,在印堂兩側,係額部最低位,天中相對呢度係一條直線,如果天中飽滿,天岳多數都靚,天岳個位唔靚就容易招惹無謂是非,就算眼尾下垂,好怕事,是非都會走惹你,,左廂內府係天中側邊第二隻手指位,左廂左邊,右廂右邊,天中係16歲,所以如果有紋有表示屋企裏面一定有嘈吵令佢唔可以專心讀書。
高廣尺陽武庫同,軍門輔角邊地樂。
高廣天中左右兩邊,天中兩邊各分九個部位,一隻手指位約佔兩個部位,左右一樣,順序為天獄、左廂、內府、高廣、尺陽、武庫、軍門、輔角、邊地,呢度話高廣、尺陽、武庫同,高廣代表掌權,有缺陷就表示容易失去權力。尺陽代表執行任務時候安全程度,呢個位置係天中同額角中央,如果有紋有晦暗之色,出外工作就要小心,武庫絕不宜有,如果有或晦暗表示從事武職就會多意外。軍門亦係代表武職,但係同權力有關,輔角同邊地即係額角最高位置,亦係額邊一隻手指位,如果呢個位凹陷,想升職就好難,如果飽滿就表示有異路功名,色暗就小心出外做事安全,如果天中橫向後面一半都呈現暗色話,就唔好講出外做,就連出外旅行都有問題。
第二天庭連日角,天府房心父墓約。
天庭左右共有九個位,左邊有日角,右邊就係月角,跟住就係天府房心、父墓、上墓、四殺、戰堂、驛馬、吊堂等九個部位。呢度主要係講天庭,其他部位都係輔助天庭的,首先天庭一定要同日月角相連飽滿,主幼年有父母福蔭,最忌有紋破,如果有氣直沖印堂主一路順風順水,無乜阻力,如果淨係日月角凸表示呢個人聰明但係好難教,天府日月角側邊,如果日月角太高,天府位就低,呢個位低或色晦表示就算有高職位都無運行,亦都表示呢個人係身居高位而唔會体恤下屬人,就算屋企都唔會對老婆好。房心呢個位飽滿就表示呢個人有為人師資格,如果同日月角天庭相連貫就唔單止做老師,重有可能做國師。如果房心低陷色晦就會有誤人子弟情形,父墓呢個位就係睇一個人有無回饋之心,有紋色暗就搵錢唔使俾老豆。
上墓四殺戰堂前,驛馬弔庭分善惡。
上墓就表示祖蔭,飽滿表示祖蔭得力,如果缺、紋、暗就表示好難有長輩助力。四殺主一個人內在威嚴,同戰堂一齊睇,戰堂飽滿表示有正義感,有紋色暗主鐘意惹事、爭訟,但多數輸。驛馬位平滿,遷居遠行都係睇呢個位,有明王之色梗係好,色暗就唔好遠行,色赤主遠行有病。吊庭代表親人長壽與否,左邊代表內親,右邊代表外戚,那一邊色暗,表示對你負累,左邊吊庭表示內親去世或者重病,而對你有負面影。如右邊色暗表示外戚有病甚至去世,亦都係同你有關連的,如果氣色發青就唔係人地事,而係自己的事,病多。
第三司空額角前,上少府位相連。
司空在22歲的位置,一隻手指位,左右同埋一樣,呢個位飽滿、光滑就好容易接近有地位人,即係司空側邊一隻手指位要無紋,無破就可以成日接近有力人士,如果有紋破就好容易有官司問題。如果有紋侵入,加上理財位凹,就一定因爭訟而破財,如果有紋而加上鼻顏色唔好,就可能失職,或者為官者會降職。上少府係代表容易接近貴人。
交友道中連額好,重眉山林看隱賢。
交友同道中呢兩個位要同驛馬一齊睇,如果飽滿無紋破,驛馬位色好,就會有朋友之助,包括去遠行順利,交友故名思義就真係講交朋結友,如果有少少紋就最唔好,在段時間就真係會誤交損友。道中就係去第二度途中,呢個第二度一定係要離開自己於生活地方,如果有紋,尤其是係小毛毛紋就最差,表示出外途中有唔愉快事出現。重眉出林兩位飽滿、靚就表示個人有勇氣,但係過於飽滿就會變成俾氣差,有缺就橫蠻。山林呢個位應該係頭髮邊一隻手指位,無破就表示呢個人性格好隨和,如果凹陷就會流於小器。最後到隱賢,呢個位飽滿對自己名氣好重視,等閒唔會做損害名氣事。
第四中正接龍骨,虎眉龍角及輔骨。
呢度中正接龍骨唔,因為中正自己有名叫龍骨,25歲至28歲,年年都有職升,呢度飽滿明亮就做好容易升職。應該係中正接龍角,虎眉即係虎角,亦即係中正位兩側一隻手指位,通常呢個位飽滿主有權力,如果你色好主有遠行升職,如果額頭黑就梗係差,但係通常都唔會成個額頭黑的,因為基於面無全色基本條件,一定要判斷某一個部位,亦都唔係真係要黑先至衰,只要小小青暗就會有麻煩,輔骨即係中正第二隻手指位,係話呢個位平滿對做事職位會高,亦即係話中正位最少都要有兩隻手指闊度飽滿,呢個位飽滿就有人提,所以中正位好緊要。
懸角斧戟井華蓋,福堂交外鎌色惡。
一路向額邊伸展,主一個夠唔夠,呢度係眉山上面位置,華蓋主宗教或者正邪之事,或者鬼神之事過於高或過陷都主人性格迷信,福堂主福祿之事,紅潤就有喜事,但係唔係自己喜事或家人喜事就要睇埋其他部位,如果福堂部位紅潤加上鼻樑色明亮就一定係自己有喜事,如果眉明潤就主兄弟有喜事,如果臥蠶紅潤就主兒女有喜事,如果未結婚,就一定係男女之事。如果奸門明潤就一定係夫妻間的喜事,郊外就真係主出外之事,呢度唔係講旅行,而只係講去平時少去地方,嫌色惡即係氣色青藍就要小心,如果髮腳茸毛多都有問題,呢度近髮邊就較為難睇。
第五印堂刑獄起,相接蚕室林中紀。
印堂又叫做命宮,平滿如鏡,一生都好運,呢度係面相十二宮之一,係最緊要部位,氣色青暗就會有大問題,一定係造唔順利,呢度原則上係唔會光的,其次就係忌橫紋,忌無端有痣,有暗瘡,表示當時所謀事肯定唔成功。刑獄又叫交鎖,貼住印堂位係印堂輔助位,最忌由印堂有紋伸入,就容易惹官司。蚕室緊貼住刑獄,叫得做室就一定關係屋企裏面人際關係,呢度係眉頭位置,如果眉頭生得過低或者眉頭有倒毛,就一定係屋企裏面出現好多麻煩。林中眉四分一位置,呢度代表一個潛在能力,在惡劣環境之下會唔會氣餒,呢度係同蚕室一齊睇,如果呢個位生得好表示唔如意時候有家庭支持。
酒樽神光及嬪門,劫門巷路青路裏。
酒樽就真係睇飲唔飲得,要配合神光一齊睇,神光係講理性化,無紋破就表示飲酒唔會亂性,如果呢度層皮好薄,就容易酒後亂性。嬪門係講同異性相處,如果有什毛,就同異性相處無咁容易相熟。劫門、巷路、青路呢三個位都係關於安全性的,劫門係人身安全,位置眉山之後,眉山後一隻手指位,千祈唔好凹,如果凹陷有紋,眉有破,就容易遇到死牛之事。巷路就代表一個人出入平安,最唔好就係有棟企紋,就真係出入唔得平安,例如行路無端端跌倒,青路係講出入公門,如果眉尾位凹或有青暗就最好避免出入公家地方。
第六山根對太陽,中陽少陽太陰望。
山根在面相十二宮裏面係疾厄宮,主宰一個人健康、波折、決斷能力,四十一歲之後運氣,一個人領導能力,亦都係財富來源,山根係束龍位,如果山根厚,表示財源順利,有橫紋就表示有波折,如果山根沖上印堂,代表有貴人提。太陽、中陽、少陽係左眼,太陰、中陰、少陰係右眼,就係呢度話太陰望,眼睛瞳人細,眼一定藏神,37、38歲一定有大發展,眼尾向上就唔會性事,,呢度太陽、中陽、少陽係左眼成隻眼位,相對於右眼太陰、中陰、少陰亦都佔晒成隻眼位,如果兩隻眼眼尾都向上就表示39、40可獲大利,但係如鴛鴦就呢兩年都唔會有好運,因為眼部一定要對稱,如果唔平衡就兩年都差,如果太陽太陰低陷就35、36會有破敗。
魚尾奸門天倉接,天井天門元中藏。
魚尾、奸門係同埋一齊推斷,要求係無紋,平滿,可得配偶助力,以前就集中男性方面,呢個位好就有賢妻,現在好多女人呢個位生得好都得到好老公。天倉就係我俗稱理財位,飽滿就容易到財祿,低陷就好難有錢剩,搵得到都剩唔到,呢個部位包括埋天井、天門、中元(又名玄武)。天井係主偏財,有無橫財亦可以睇天倉範裏面。天門同玄武(元中)係一齊,代表有無朋友的助力,亦要相關部位配合,就係眉尾夠結實就表示唔單止朋友多,重係有力添。
第七年上夫座參,長男中男及少男。
年上係鼻樑位,與淚堂平衡,多數呢度都有節位,如果係見骨就有波折,如人為婚姻事煩惱,男人就為錢煩惱,如果唔露骨就表示有侵咯性,進取性。如果有紋,在上半部就主內親有問題,如果下半部就主外戚有問題。夫座在年上滑落鼻側位,呢個位低陷主有桃花,男女都一樣。夫座係女相名,而男性就叫妻座,除低陷主多桃花之外,亦主多指背,無論做得點努力都好,都好難得到讚賞,重兼夾多人篤背脊。左眼長男、中男、少男包括在淚堂,臥蠶位裏面,而女相就右眼代表長男、中男、少男,代表有無拍拖,結婚之後就代表仔女好與壞,年輕時主仔女健康,晚年就主仔女對自己點樣。
金匱禁房盜賊動,游軍書上玉堂探。
呢幾個位該一齊睇,眼肚位置平滿有光澤,就好難會遇到盜賊,但係眼肚位置灰暗,加上有直紋或亂紋,就好大會遇到賊劫,最常見就係俾人打荷包。游軍在眼白對下,呢個位相應額角驛馬位,驛馬位係決定有無運行,而游軍就決定遠行會唔會有阻滯呢度主要係睇色,如果色暗就有阻滯,但係未至於有意外。書上位置奸門下面,係代表文件上事,如果發覺呢個位有暗瘡,就要小心文件上會有錯漏,例如唔記得交費,或者簽錯名等等。玉堂就係權插天倉位,係代表行使權力,最忌下陷,有權骨而呢個位低陷,表示有權力慾而無行使能力。
第八壽上甲匱依,歸來堂上正面時。
壽上鼻樑位置,年上之下,代表外戚,雖然叫壽,但係同長壽與否並無直接關係,如果色暗就代表屋企裏面女人有麻煩,其實應該係老婆外家麻煩。甲匱亦叫財庫,鼻翼上方,一定要飽滿先至代表有才幹,低陷就唔慌會有才幹。歸來代表有無餘錢,係勺陳位下方,色好亦代表有遠方信息。堂上正面兩位一体,眼下吋半左右,亦都叫禾倉,中年運就除睇鼻之外就要睇正面呢個位,呢個又係正權骨位,銀匙歌裏面有云:「中年倉庫看禾倉,禾倉有陷無餘糧」,又有一句「更有禾倉陷一寸,中年猶未有夫娘」,最忌低陷無肉。
姑姨顴勢好兄弟,外甥學堂命門基。
姑姨同顴勢亦代表外戚力量,再加埋外甥呢個位,好多人面中線位有橫紋,就表示佢成日都受外戚左右,自己主意時候就自然好多唔等使人加意見,令你左右為難。兄弟又真係代表兄弟,呢度一堆名辭其實就係面珠位,呢度飽滿唔單止相貌靚,重好得人緣。學堂位置耳前髮腳前一手指位,飽滿就多數都可以讀得成書,如果見根就讀書好難有成。命門即耳門前一手指位,命門色好就表示精神飽滿。
第九準頭蘭廷正,法令灶上宮室盛。
準頭係財星尖端,山根就係財星來龍,所以睇準頭一定要自己來龍,來龍窄準頭可以尖,來龍厚準頭一定要圓,但係無論係尖或者圓,皮一定要厚,如果皮薄就講乜都多餘。蘭廷即係諫台,廷頜兩邊鼻翼,要厚要夠闊,夠闊就財運好,夠厚就手段光明正大,如果又薄又窄,氣量淺,好多事都弄巧反拙。法令要45歲後見到就最好,太早見法令就辛苦,女人就老公辛苦,兩條紋開闊就有權威,有人緣,過深性格頑固,過淺未有法令作用,斷續表示腳有問題,同時一定要過口,唔過口就鎖唔住水星,講唔負責。灶上即係鼻尖橫肉,係睇一個人到老時候有無積聚,如果無呢條肉,就容易俾親人劫財。宮室係鼻周圍顏色,有微血管見到表示夫妻感情唔好。
典御囤倉後閣連,守門兵卒及印綬。
典御法令側邊兩隻手指位,係指出外適應能力,亦都代表對環境適應性。囤倉係面部中間,即係酒渦位,通常有酒渦人老就要為兒為女心。後閣接近牙較位置,通常食時候呢度會郁,越係郁動就表示唔可以坐定度做,一定要周圍走。兵卒同印綬兩個位一齊睇,貼近耳仔位置,呢個位低陷就想指人做都好難,如果加上食指短就好難身居高位,呢度幾個位置都係以氣色為主,最好唔俾頭髮蓋住。
第十人中到井部,帳下細廚內閣附。
人中標準係長、闊、深、正中、有溝壁,代表仔女多少,女性就代表生產能力,忌短、淺、歪、窄,如果青年人無人中,多數都要領養他人之子,人中無毛子亦少,亦代表管理能力低。井部包括仙庫、食祿倉,一定要厚,薄親就身体有問題,牙力亦唔好,如果笑時候縮上去,到老可能要捱餓。帳下、細廚、內閣,係法令插穿而過位置,如果法令呢度開而入口話,想唔餓死都唔得,最唔好就係有粒痣,所謂美人痣,就一生都會捲入多角關係之中。
小使還當妓堂前,嬰門博士懸壁路。
小使妓堂同埋一齊睇,係代表有無使人命,配合奴僕宮夠唔夠飽滿,如果奴僕宮有紋或凹陷而小使妓堂平滿都有補救能力,如果連呢度都有橫直紋破,想工人聽話就好難。嬰門博士同埋一齊,位置牙較前面,代表有無一技之長,如果食時候呢度向內凹,就表示呢個人無乜特別技能,可能係週身刀類。懸壁位置咬凸起位,如果咬唔凸起,到老身体一定多病,如果太過凸,呢個人時刻都諗住作反的,亦可以話成日都諗住點樣去「發圍」不甘心居人之下。
十一正口閣門對,比鄰委巷通衢五。
口唇厚薄均等,兩角向上彎性格優良,有正義感。唇薄而無稜講唔負責任,口角圓而厚,慾念旺盛,体形細而口大就主容易出人頭地,体形大而口小就性格保守,氣量淺。閣門位置口角,好多人口角都有一舊肉,口角有一舊咁肉,呢個人就一定講好有威嚴,如果加上法令夠深,唔止有威,重有權力。比鄰閣門側邊,書上話「比鄰平滿必有芳鄰」,呢度有橫紋,就一定同隔離鄰舍嗌咬。委巷通衢呢兩個位代表出入,代表年老時候出入平唔平安,如果有紋有痣就要小心行路容易有意外。
客舍兵蘭家庫中,商旅生門從續繼。
客舍係代表一個人唔好客,如果有皺紋,呢個人就唔多鐘意招呼人番屋企。兵蘭同家庫一齊,代表呢個人對門戶小心程度,如果呢個位好飽滿,就算落樓下信都要鎖晒所有門先至放心。商旅生門代表做生意手法,呢位近腮邊牙較部份,如果皮包骨表示呢個人營商未必會正當手段。從續牙較位耳下面,係代表持久力,做會唔會三分鐘熱度。
十二承漿居宅安,還有外苑林苑看。
面上任何部位都唔主張凹,但係人中同承漿就要有凹陷。人中飽滿就生殖能力衰退,承漿飽滿到老會無積聚,但深得太窄主呢個人又孤寒,加上理財位飽滿,就更加一毛不拔。居宅承漿側邊,呢個位就應該平,亦即係話承漿凹位置唔可以太闊,如果太闊就會影呢個位置,因為居安呢個位係代表可唔可以長期住一間屋,搬屋機會多唔多。外苑同林苑即係咀角過,通常住村屋而有花園人,呢個位置都會靚,但係依家好多深圳有屋人呢個位都好靚,就同有無錢關係唔大。
下墓莊田酒地上,郊廓荒坵道路寒。
下墓係代表墓地好壞,呢個位無紋無,可以預知自己會有一個好墓地,古時人對自己將來墓地係好重視,所以先至有一個部位專表示自己來墓地。莊田同酒地係代表60歲之後生活係頻撲抑或優柔,古書話莊田平滿安享天年,所以呢度無亂紋就表示晚年生活安定,而酒地就係顠示食能力,要同食倉一齊睇。郊廓係代表六畜平安,依家好少有六畜,而係養寵物多,呢個位皺皮有紋話,就算養幾條魚毛仔都要游背泳。荒坵、道路係表示老年人行路安全程度,位置近腮邊,老人家容易跌倒就係呢個部位薄而見骨,上車落車都要小心。
十三地閣下舍隨,奴僕碓磨坑塹危。
地閣要求係無紋,肉厚,圓或者方都係好,地閣圓就表示性格較為和順,地閣方就表示性格較為執著,如果方而凸出就鐘意理事,因為地閣係代表實行能力,最忌向後縮、薄、尖、露骨。下舍應該同奴僕一齊睇,有橫紋就想有人聽你話都好難,重兼好容易俾人累,如果咀角有直紋就好,法令夠長就好。確磨係種工具,以前就係生財工具,依家亦都代表生產工具,呢個位置同眼成直線位,如果有暗瘡就所用工具會時時壞,就算電視錄影機都會隨時壞。坑塹應該係依家圍欄,有暗色表示住地方會有損壞,依家最常見就係水喉壞。
地庫陂池及鵝鴨,大海舟車無憂疑。
地庫又叫地倉,呢個位豐滿係好緊要,因為呢度係成個腮邊中間位,所以呢個位豐滿就可以令到側邊幾個置都連帶好埋,但係都要配合天倉豐滿,地閣有肉,就應古書上地庫圓闊,家有餘錢,如果人肥而地庫薄就晚年好極有限。陂池,鵝鴨近腮骨位,但係要配合酒渦位睇,有酒渦係唔好。陂池、鵝鴨薄而有酒渦就想有錢剩都難,如果陂池鵝鴨厚而有酒渦就表示仔女唔得力,如果加上子女宮差,就仔女就一定走入歧途。大海舟車就係耳後見腮位置,呢個位如果皮薄見骨就主遠行失利,尤其是移民係最差。如果驛馬位薄而陷就唔好講話去移民,就算去短線旅行都會有唔愉快事發生,例如遺失行李,或者與團友嗌交。
您需要登录后才可以回帖 登录 | 注册会员

本版积分规则

快速回复 返回顶部 返回列表